Jou Mei 2018-leesplesier!

Alles begin met ʼn soen – Dina Botha

 

Martiné kan bloumoord skree. Haar nuutgevonde stiefbroer Stefan irriteer haar. Nie net is hy ouer en gedra hom beterweterig nie, hy dra ook vervelige grys snyerspakke en doen alles volgens die boek. Hoekom bemoei hy hom so met haar doen en late en gee hy vir haar ’n spertyd vir inkom wanneer sy uitgaan?

Dis vir haar onaanvaarbaar dat Stefan haar hart vinniger laat klop, want sy is nie lus vir komplikasies in haar lewe nie. En wat van die beeldskone Amanda, wat perfek in sy rykmanslewe inpas?

Martiné besef sy moet van Stefan af wegkom want dit wat sy vir hom voel, is beslis eensydig. Hy wend immers geen poging aan om haar te keer toe sy wil weggaan nie. Wil hy haar regtig so graag sien vertrek of is sy optrede net ʼn rookskerm vir sy ware gevoelens?

Liefdesafari – René van Zyl

 

Franci moet dringend ’n man kry om ’n vennootskap by haar werk te bekom, maar vir ’n bleeksielmeisiekind soos sy is dit byna onmoontlik. En toe kruis haar pad met die van die superaantreklike Gavin … Hy moet weer blitsig ’n vrou kry om ’n wildsplaas te erf.

Om mekaar uit hul onderskeie dilemmas te help besluit hulle om vinnig te trou. Dit ís immers net ’n skynhuwelik, dan nie? En al is dit nie regtig nie, moet hulle darem minstens die soenstorie ernstig opneem – en ook die intieme dansery …

Boonop is daar ook twee slange in die gras – Kevin en Corlia –  wat probeer om die kammahuwelik te kelder. Was dié skynaffêre nie van die begin af gedoem nie, of was die “skyn” al die tyd die ware Jakob in kamoefleerdrag?

Die diva en die dokter – Trudy Reinhardt

 

Danni woon tydelik op ’n eiland ter voorbereiding vir ’n operakompetisie. Haar paadjie kruis met dié van Justin en dadelik is daar ’n vonk tussen hulle.

Maar Danni se sangloopbaan laat nie ruimte vir ’n vakansieromanse nie, al neem Justin haar te dikwels op te genotvolle uitstappies. Sy kom totaal onder die betowering van sy sjarme, om van sy soene nie eens te praat nie …

Haar toekoms lê op die verhoë van wêreldstede, nie op ’n klein eilandjie nie, besef Danni. Toe sy die kompetisie wen, is dit egter ’n bittersoet oorwinning, want haar hele wese hunker na Justin. Dis egter tevergeefs, want het hy dan nie reeds finaal van haar afskeid geneem nie?

Dié keer en vir altyd – Elsa Drotsky

 

Isabeau is behoorlik vies toe Neil weer in haar lewe verskyn. Hy was immers die toeskouer van haar grootste verleentheid ná haar matriekdans. En nou red hy haar sowaar weer uit haar penaries!

Tog gaan haar hart soos ’n vlugtende wildsbok op hol elke keer as sy hom sien, terwyl hy lustig van een beeldskone vlinder na die ander dartel en haar bloot as ’n lastigheid beskou.

Sy gaan noodgedwonge saam met hom Mosambiek toe, wat glad nie goed is vir haar sielerus nie, want hy soen haar dat haar heelal tot stilstand kom. Maar dis bloot platonies, en die werklikheid terug by die huis voorspel vir haar tog net eensaamheid … of hoe?

Andolet – Petronel Louw

 

Dit is 1899. Oorlede Simon, Andolet se aanneempa, bemaak haar, soos ʼn besitting, as bruid aan ʼn onbekende pionierboer, Christian Nitze, woonagtig op sy plaas in die verre Duits Suid-Wes Afrika. Sy reis saam met haar diensmeisie, Leila na die vreemde, nuwe land. Christian daag nie op om haar in Walvisbaai te ontmoet nie, maar stuur sy nors neef, Ferdinand, om met haar met die handskoen te trou.

Die uitmergelende tog met die ossewaens van Walvisbaai, deur Swakopmund na Windhoek, leer haar oor meer as net die barre Dorsland waardeur hulle trek. Dit laat ʼn vlam tussen haar en Ferdinand ontspring, maar dit mag nie. Sy is, ná alles, ʼn getroude vrou.

Andolet maak vroeg kennis met die onrus tussen die Herero’s en die boere. Haar lewe is in gevaar toe dit bekend word dat die hoofman van die Herero’s haar wil ontvoer. Die aankoms van haar sogenaamde Franse familie begin egter stadig haar ware identiteit ontbloot …

RomanzaKlublede kry 50% afslag op SuperRomanzas! 

Uit die bloute – Chanette Paul

 

ʼn Handgeskrewe brief veroorsaak ʼn kettingreaksie van botsende belange.

As grafoloog kan Ayla Hurter sien die skrywer van die brief sal nie huiwer om iemand kwaad aan te doen nie. Boonop is die handskrif Diana Krause sʼn – haar suster Nimue se boesemvriendin. Ayla besef sy moet Nimue opspoor en teen Diana waarsku – al het sy elf jaar laas van haar gehoor.

Irene Richter beskou grafologie as snert. Sy is oortuig haar suster, Diana, is gebreinspoel en dat die groep waaraan sy en Nimue vermoedelik behoort, die skuld daarvoor dra. Sy sal enigiets doen om Diana te red voor sy moontlik ʼn verdagte in ʼn moordsaak word.

Jojo Richter sit vasgevang in die middel van die twee vroue wat hulle susters soek. En ná die sluipmoord op ʼn gesiene man, besef Jojo haar beloftes van stilswye kan dalk net boemerang. Veral toe dit al hoe meer begin lyk asof ‘n groep vroue wat glo dat ’n moederskip hulle na ’n ander planeet gaan neem, dalk betrokke kan wees.

Los 'n boodskap

Jou epos adres sal nie gepubliseer word nie.

U mag hierdie HTML tags en eienskappe gebruik:

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>