“Haar liefdeslewe het basies op ʼn wilde safaririt gegaan” – René van Zyl

My trooskos is

KOFFIE (en beskuit).

Ek’s bygelowig oor

Volmaan. Ek is seker daar word ʼn wilde, slaaplose weerwolf in my wakker. Ek het net nog nie die bewyse daarvoor gevind nie, behalwe vir die slaaploosheid.

Wat’s jou gunstelingwoord?

Daar is ʼn paar gunstelingwoorde wat ek nie hier kan neerskryf nie, maar kom ons sê een van die top vyf is: liewe-goeie-donner-tog.

Wat dra jy altyd in jou handsak?

ʼn Chinese oopvou-handwaaiertjie, want ek kry gewoonlik warm − baie meer as normale aardlinge.

Wie is jou gunstelingskrywer?

Die Engelse fantasieskrywer, Terry Pratchett. Veral sy Discworld-verhale. Hy is ʼn ongelooflike kreatiewe en intelligente skrywer met ʼn verbeelding wat verder strek as die verste sterrestelsel. Sy onlangse dood is vir my ʼn persoonlike verlies, maar ek is seker hy is bly dat hy uiteindelik een van sy interessantste karakters ontmoet het: DEATH.

Wat was die beste raad wat jy oor skryf ontvang het en van wie?

Ek het jare gelede ʼn skryfkursus van Robert Mckee in Londen bygewoon. Ek het so baie geleer, maar hierdie woorde het die meeste impak gemaak: “Write every day, line by line, page by page, hour by hour. Do this despite fear. For above all else, beyond imagination and skill, what the world asks of you is courage, courage to risk rejection, ridicule and failure”.

Waar is die vreemdste plek waar jy al ooit geskryf het?

Ek en my man het jare gelede ʼn kompos-depot in Hartbeespoort gehad. Ek moes dikwels in ʼn muwwerige Wendy-huisie (die kantoor) sit en verkope hanteer. My skootrekenaar was altyd by my en ek het heerlik geskryf so met die reuk van vars, broeiende hoendermis in my neusgate.

As jy nie ’n skrywer was nie

Sou jy ʼn rolprentmaker of voltydse wêreldreisiger wees.

In jou volgende lewe sal jy graag

’n Arend wil wees. Ek voel tans meer soos ʼn ou hennetjie wat soms my kloutjies stukkend skrop om te oorleef.

Is dit jou eie ervaring van die liefde wat tot jou eerste romansetitel gelei het?

Ja beslis. Ek en my man is 29 jaar getroud en ek glo aan ‘happily ever after’ ten spyte van die feit dat ʼn mens so verskil en boonop die lewe se aanslae met hierdie uiteenlopendheid moet hanteer. Dit fassineer my altyd hoe mans en vrouens wat so anders dink halsoorkop verlief kan raak en dit maak werk.

Hoe lank het jy aan jou debuuttitel, Liefdesafari, geskryf?

Ek het ʼn maand lank daaraan gewerk. Dit was so lekker. Toe ek eers begin het, het die storie en karakters die boek self klaargeskryf.

Skryf jy impulsief aan stories of versamel jy eers graag navorsing rondom die agtergrond en konteks van jou storielyn, voor jy skryf?

Ek kry ʼn gedagte en die ding kry dan ʼn lewe van sy eie in my kop. Daarna versamel ek inligting en foto’s op Google van die karakters en plekke waar hulle bly. Dit plak ek uiteindelik teen my studeerkamer se muur, amper soos wat die televisiespeurders doen met ʼn ingewikkelde moordsaak. Nog iets wat ek by Robert McKee geleer het: “Writer’s block is niks anders as ʼn gebrek aan navorsing nie”.

Ek voel altyd daar lê baie betekenis in ’n naam: Hoe kies jy jou karakters se naam en voorkoms?

Ek soek beslis baie deeglik na ʼn lekker naam wat nie net pas by die karakter se persoonlikheid nie, maar ook bewustelik of onbewustelik ʼn betekenis oordra. Ek google lyste en lyste name en vanne asook hulle betekenis voordat ek tevrede is.

Hoe het jy op die titel Liefdesafari besluit?

Toe ek eers die storielyn uitgedink het, het die naam vanself gekom. Die bleeksiel meisietjie wat deur die wildbewaarder betower is en toe op die wildplaas land. Haar liefdeslewe het basies op ʼn wilde safaririt gegaan en sy moes klou om bo te bly.

Enige wyse woorde of skrywersgeheime vir voornemende skrywers?

Skryf is gewoonlik ʼn frustrerende pad van emosionele verwerping want elke voornemende skrywer WEET verseker hy of sy is die volgende Stephen King of J.K. Rowling. Mens moet egter leer wat die uitgewers nou eintlik wil hê en hoe om dit te doen. ʼn Goeie begin is om kursusse by te woon om juis dit agter te kom. Ek skryf al lankal, alles van musiekblyspele tot vergesogte Middeleeuse verhale, maar ek het eers ná ʼn kursus van Lapa oor die skryf van Romans en Romanzas dit reggekry om te skryf wat die uitgewers op ʼn gegewe tydstip wou hê. En kry ʼn goeie Afrikaanse speltoetser.

Los 'n boodskap

Jou epos adres sal nie gepubliseer word nie.

U mag hierdie HTML tags en eienskappe gebruik:

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>