Liefdesafari – René van Zyl

“Lois Lane, as ek dit nie mis het nie?” vra ’n diep stem agter haar. Sy sien in die spieël se refleksie dat dit Superman is en skrik haar boeglam.

“Wat?” vra sy uitasem en vlieg om. Sy voel soos ’n standerdsessie wat skielik met die rugbykaptein moet praat.

“Jy is verseker Lois Lane. Superman se meisie?” vra hy met ’n skewe glimlag wat haar hart nog vinniger aan die hardloop laat gaan. Dis ’n glimlag wat seker menige standerdsesse laat swymel het.

“Ek is?” vra sy en probeer haar bes om normaal te klink. “Ja, o ja, daardie joernalis. Wat op hom verlief was. Wat hy saam met hom. Laat vlieg het. Net so.” Hemel, maar sy kan nonsens praat. Ruk jouself reg, sussie.

“Net so. In die regte lewe is ek Gavin Michaels.”

“Nee, dis Clark Kent.” Sy bloos. “O, ek bedoel, o ja, jy bedoel dié regte lewe.” Aarde, sluk my in. “En ek is Francisca von Lelieveld.”

Hy glimlag met sy wye mond en frons tegelykertyd. “Francisca von Lelieveld. Dis ’n mond vol vir so ’n klein mensie. Jy lyk meer soos ’n Franci. Van die lelievelde. Ja, dit klink beter.”

’n Skinkbord met nog vonkelwyn kom verby. Hy vat twee glase en gee vir haar een.

Sy vat dit en drink ’n groot sluk. Die man verbouereer haar. Gee haar liewer syfers en vooruitskattings, nie so ’n aantreklike man vol geselsies nie. Het hy nie ’n meisie wat hom kan besig hou nie? Cat Woman of prinses Layla of iemand?

“My ma sal jou stenig. Ek het my ouma se name gekry: Francisca Jacoba.” Sy lag vir sy geskokte gesigsuitdrukking. “Ja, dis ek daai.” Sy het al geleer om te spot met haar tekortkominge, wat insluit ’n effens obsessief-kompulsiewe persoonlikheid wat dalk ook te doen het met die feit dat sy onder die perfeksionistiese Virgo-sterreteken gebore is. Aldus Marissa, wat almal se sterretekens aan hulle persoonlikheid koppel.

“Goeie Boerename met inbors,” glimlag hy. “En as Lois Lane nie vir Superman verlei nie, wat doen sy heeldag?”

Dis seker die vonkelwyn wat regdeur haar nugter maag na haar kop toe gegaan het, maar sy voel skielik lus om met die man te gesels asof hy regtig in haar belangstel. Asof sy regtig Lois Lane is. As haar simpel eksverloofde haar darem nou kan sien! Ja, sy kan ook spontaan wees.

“Wat dink jý doen ek heeldag?” vra sy guitig, haar lyf warm van die vonkelwyn en van sy haselneut oë wat vir haar heeltemal lyk of hulle hou van wat hulle sien. Asof dít baie met haar gebeur.

Hy kyk haar op en af. “H’m. Kom ek raai. Die kort blonde hare, formeel gekam maar staan tog weerbarstig orent.”

Sy trek haar hand deur haar hare. Lyk sy so sleg?

“En die fyn liggaamsbou, goedgevormde kuite. Die gefokusde kyk in daardie blou oë.” Hy vee ’n haarlok van haar voorkop af weg en haar hart maak opgewonde flikflakke. “Ek dink jy is ’n giminstruktrise.”

Sy kyk hom met ’n verbaasde frons aan en bars uit van die lag.

Sy glimlag word breër en sy oë dans. “Is ek reg?”

Sy sluk haar lag. Die vonkelwyn maak nie reg met haar nie. Sy is heeltemal te geselserig. En te waagmoedig. “Jy kan nie meer reg wees nie.” Hoekom jok sy? Sy is ’n vervelige ou vaal rekenmeester en al oefening wat sy heeldag kry, is om tussen die kantoor en die toilet en die teekamer rond te draf. Wat maak dit saak? Dis net geselsies met ’n baie aantreklike man met dromerige oë. “En jy, wat doen jy?”

“Wat dink jý?” vra hy met ’n skewe glimlag en sluk sy vonkelwyn.

Sy kyk hom op en af. Hý lyk meer soos ’n giminstrukteur. Daardie armspiere en plat maag en sjoe, maar sy gesig is perfek. Die sterk kakebeen, breë glimlag en donker krulhare. Sy wil sommer ’n lok uit sy gesig ook vee.

“Wat het jy besluit?” vra hy.

Sy skrik uit haar droomwêreld. “H’m, jy is ’n pen pusher.” Sy lag vir sy geskokte gesigsuitdrukking. Vir wat giggel sy vanaand so baie? “Nee, ek grap net. Jy is verseker ’n trokdrywer. Ek bedoel met sulke boarmspiere behoort jy lang ure agter ’n groot stuurwiel te sit.” Sy giggel weer.

Los 'n boodskap

Jou epos adres sal nie gepubliseer word nie.

U mag hierdie HTML tags en eienskappe gebruik:

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>