Na hoër hoogtes – Marijke Greeff

Nick kyk op in haar groot, blou oë en die hartseer trek om haar mond laat sy hart ruk. Siestog. Die vriendin is seker baie mooier as sy, en nou is sy haar verloofde kwyt.

“Ek is jammer.” Dis nie dat sy lelik is nie, dink hy. Sy lyk net vaal en oninteressant.

Sasha kyk op. “Dit is nie nodig om te simpatiseer nie. Jy kan eerder sê ‘good riddance’,” herhaal sy sy woorde van flussies en hy lag. “Ek dink in elk geval my ego het meer skade gely as my hart, want behalwe dat ek kwaad is oor ek vir die gek gehou is, is ek eintlik baie verlig dat die verlowing verbreek is.”

Nick kry sy oë nie weggeskeur van haar gesig nie. Sy het geen grimering aan nie en haar vel is glad en vlekkeloos. Sy het ’n gesonde blos op haar wange, en haar oë, so blou soos die uitspansel bo hulle koppe, is omring deur digte, donker wimpers. Haar lippe is rosig en pleit vir ’n man se soene.

Hy kan homself nie help nie. Ten spyte van haar vormlose kleredrag en onvleiende bolla, is sy vir hom verfrissend anders. Hy is gewoond aan ’n vrou wat nooit haar voet by die deur uitgesit het voordat haar hare perfek is en sy haar hele gesig met grimering beplak het nie. Sasha met haar T-hemp en sweetpakbroek is so anders as die beeldskone, ydel vroue van wie hy genoeg gehad het om hom ’n leeftyd te hou.

“My gewese vrou is beeldskoon en het my voete onder my uitgeslaan. As ek ooit weer trou, en dis ’n baie groot as,” sê hy nadenkend, “sal ek met ’n onaantreklike, onbekende vrou trou. Die spreekwoordelike lelike eendjie. Sy sal hier op die plaas bly. Geen partytjie elke naweek en fênsie onthale in die stad nie. Ek sal haar kaalvoet en swanger hou. Voor die stoof.” Hy draai sy kop skeef en tuur vir ’n oomblik in die verte. “Ja, dit klink vir my na ’n volmaakte huwelik.”

Sasha se mond is skielik droog toe sy die prentjie in haar gedagtes sien: sy met ’n groot, ronde maag voor ’n outydse koolstoof. Sy sal hom by die deur inwag wanneer hy in die aand huis toe kom, en sy sal doodtevrede wees om hier op die plaas by hom te bly en hom met niemand te deel nie.

Nick sit die gereedskap terug op die bakkie en sy wip soos sy skrik toe hy skielik langs haar praat.

“’n Rand vir jou gedagtes?”

Sy voel hoe haar wange warm word. As hy maar net weet! “Jou idee van ’n volmaakte huwelik klink vir my maar bra chauvinisties.”

“Hoe oud is jy, Sasha?”

“Nege-en-twintig,” antwoord sy sonder om te dink.

Sy donker oë beweeg oor haar gesig. “Nege-en-twintig jaar oud en jy kan nog bloos soos ’n skooldogter. Ek dink jy is die agtste wonder van die wêreld.”

Bederf jouself met Marijke Greeff se Na hoër hoogtes: https://bit.ly/2HWkNTQ

Los 'n boodskap

Jou epos adres sal nie gepubliseer word nie.

U mag hierdie HTML tags en eienskappe gebruik:

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>