ALMAL vang GRAAD! – Zhan-Mishal

Ja, hier by LAPA werk ons dat die rook party dae behoorlik by ons ore uitrek, maar het julle geweet baie van ons vang nog graad of altans grade tussenin ook? Ja, in my tyd by LAPA het my kollegas al groot akademiese hoogtes bereik.

Nandia Brand werk as rekenmeester in ons finansies department en sy het in Maart haar BCompt Finansiële Rekeningkunde graad voltooi.

Marida Fitzpatrick, ons Senior Niefiksie uitgewer het in Mei haar MA in Kreatiewe Skryfkuns voltooi en met lof geslaag.  Sy het ook ʼn brief ontvang wat haar gelukwens daarmee dat sy die Gerhard Beukes-prys gaan ontvang vir die student wat die beste skeppende skryfwerk in Afrikaans gelewer het. WOW Marida!

Mia Oosthuizen, ons Senior Kinder- en Jeug-boek uitgewer het ook haar DLit et Phil (DOCTOR LITERATUM et PHILSOPHIAE) met onderwerp: ’n Ondersoek na die parateks (Gérard Genette) as ’n narratiewe strategie in geselekteerde Afrikaanse kinder- en jeugliteratuur in April  voltooi.

Wel gedaan kollegas!

Dit is met trots dat ek skouer teen skouer met my kollegas hierdie trots kon deel toe ek in Mei ook my BIS Uitgewerswese graad voltooi het en ’n spog gradeplegtigheid kon bywoon. Ek het heeldag breed geglimlag en kon nie vir ’n oomblik ophou trots wees op al die harde werk wat my na hierdie punt gelei het.

Dit was baie swoeg en sweet, soms ’n paar trane, 3 beste vriende later en nou uiteindelik ook ’n graad.

Tussen al die gelukwensings deur het een of twee mense my wel gevra hoekom ek eerder gekies het om my loopbaan af te skop eerder as om verder te studeer. Dit het my vir ’n week of twee laat wonder of ek wel die regte keuse gemaak het om dadelik in ’n professionele beroep in te stap en of ek later in my lewe wel die sprong terug na die akademie toe sal kan maak.

Met die gedagtes is ek fronsend na my slim tandarts toe vir my jaarlikse ondersoek en sy woorde daardie dag sal my altyd by bly. Hy het aan my verduidelik dat dit juis ’n loopbaan eerder as ’n resiesbaan genoem word en dat ek moet weet die lewe is lank en lê nog oop voor my. Ek kan alles bereik waaroor ek droom, met tyd is elke doelwit haalbaar.

Sal ek dan nou wragtig vergeet dat Rome nie in een dag gebou is nie, en dat die beste wyn jare neem om hulle volle potensiaal te bereik?

Ek los julle dus met die gedagte dat mens nooit moet voel jy sekere drome nie kan meer najaag net oor die lewe ander draaie met jou maak nie. Al my LAPA kollegas se sukses eggo die stelling net weer en dus lig ek vir ’n laaste keer ’n denkbeeldige glas sjampanje in trots op al die mylpale wat ons reeds bereik het en nog beplan.

Los 'n boodskap

Jou epos adres sal nie gepubliseer word nie.

U mag hierdie HTML tags en eienskappe gebruik:

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>