Die stemme agter stories – Zhan-Mishal

Wat is dan nou beter as ’n boek? ’n Storie wat jou bladsy vir bladsy en woord vir woord meevoer op ongelooflike avonture na onbekende plekke … Ek het nou lank en hard gedink en vir my is daar niks beter nie. Wel, dit was tot ek die geleentheid gekry het om ’n groep skrywers te ontmoet en die wonder in hulle oë te sien en te weet daar is eintlik nog eindelose stories en karakters wat diep binne hulle woer om uit te kom en hulle eie weg op jou boeke se bladsye te vind.

Hier by LAPA beplan ons al ’n geruime tyd aan ’n Fiksie-Skrywersindaba. Vir die wat nie weet nie, ’n indaba is ’n samekoms geleentheid waar ’n groep mense mekaar raadpleeg en debatteer oor belangrike onderwerpe. Dit klink seker baie formeel en vervelig, maar ons indaba was alles behalwe formeel of vervelig. Die LAPA-fiksieskrywers wat Pretoria hulle huis noem het heeldag heerlik saam gekuier en oor karakters en stories gesels.

Ek moet bieg ek was heeldag eintlik … starstruck met die wete dat ek aan ’n gesprek kan deelneem saam met legendariese skrywers soos Sophia Kapp, Madelein Rust en prof. Hans du Plessis. Ons het die dag nie net met smul lekker ontbythappies afgeskop nie, maar ook met ’n visuele reis wat wys hoe die fiksiegenre en boekvoorblaaie oor die laaste 14 jaar by LAPA Uitgewers ontwikkel en uitgebrei het.

Kort daarna het een van ons getroue redigeerders, Joanita Fourie, ’n gesprek oor taalversorging en algemene foute wat gereeld in Afrikaans gemaak word behartig. Hier het ek net weer besef dat mens elke liewe dag nuwe dinge leer en dat ’n woordeboek jou beste vriend moet bly.

Noem my maar ’n millennial as jy wil, maar tydens Romy Sommers, die stigter van ROSA, se gesprek oor persoonlike branding en die benutting van sosiale media kon ek my aandag nie vir ’n oomblik verdeel nie. Mense raak vinnig bang vir die mag van sosiale media platforms en ek stem, dit kan nogal intimiderend raak. Tog kan jy jouself so maklik bemagtig en jou sosiale media en eie brand bestuur met die nodige kennis. Romy se gesprek het van kennis oorgeloop en dit was vir my ’n terugflits na universiteit dae so vining het ek al haar wenke probeer neerskribbel.

Madelein Rust het die dag afgesluit met ’n gesprek oor tydgees en hoe dit die inhoud van ’n storie kan beïnvloed. Ons het saam ’n fantastiese speletjie gespeel waar ons ’n kort bio gelees het en dan afwisselend karakters uit die storie se foto’s ontvang het. Elke persoon moes dan self ’n karakterprofiel skryf en die storielyn vir hul karakter bepaal. Ek was verstom om te sien hoe kreatief en ook uiteenlopend almal se idees was. Dit is seker maar presies wat mens kry as jy klomp waardige skrywers in ’n vertrek saam bring.

Ek belowe ek was steeds in Junie produktief op kantoor. Ek het my rekenaar daagliks beman en gereeld e-posse beantwoord, manuskripte gelees, boeke se produksieprosesse bestuur en verskeie krisisse opgelos. Maar hoekom sal ek julle nou daarmee verveel as ek eerder my opgewondenheid om verskeie skrywers te ontmoet, met julle kan deel?

PSST − Gaan kyk ook gerus op ons Facebook blad na die videos, wat ek en ons digitale koördineerder, Sumarie, deur die loop van die dag geneem het. Daar is soveel interessante feite oor wie die skrywers by LAPA werklik is en wat hulle grootste verse is en hul hart vinniger maak klop.

Groete tot volgende maand!

Zhan-Mishal

Los 'n boodskap

Jou epos adres sal nie gepubliseer word nie.

U mag hierdie HTML tags en eienskappe gebruik:

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>