Sewe lekkerleesboeke vir die sewende maand van 2018!

Towerman – Wilreza Smit-Theron
Lea reis na Zanzibar om innerlike genesing te vind, want drie jaar ná haar man se dood rou sy steeds. Wie is die reus van ’n blondekopman met mosgroen oë wat daar as haar hoeder optree én die lig in haar weer aansteek?

Somersprokie – Alma Carstens
Charlotte, oftewel Charlie, vra vir Christiaan om haar te help om haar seehuisie op te knap, maar hy besef hy sal sy gevoelens vir haar in toom moet hou want wie sê haar verhouding met James Duncan, die internasionale rolprentheld, is verby?

My ster jou ster − Malene Breytenbach
In Milan ontmoet Tatiana, ’n Suid-Afrikaanse sopraan, die aantreklike operaster, Igor Radonowski. Hy maak haar maak bene lam, maar sy vind uit dat hy getroud is. Sy moet sy aantrekkingskrag weerstaan …

Stoppelbaardsoene in Santorini – Cecilia Steyn 
Isak Clarke en sy aangenome seun, daag onverwags ’n dag vroeër in Santorini op. Isak is gewoond om sy sin te kry, maar hy sal dit nie met Gita regkry nie. As hy nie net die mooiste ongeskikte man was wat sy nog ooit gesien het nie!

Man sonder weerga – Bets Smith

Bets Smith is een van Afrikaans se gevestigde skrywers. Behalwe vir romanses, skryf sy ook spanningsverhale. Hierdie omnibus is ’n samestelling van drie van haar vorige Romanzas:

Die towerformule:

Esti se nuwe huisbaas op die Noord-Kaapse dorpie verwar haar. Is Bernhard Ehmke die beer, wat hom oor vroue ontferm, of die wolf, wat harte verorber? Maar beer of wolf, dié dokter sal haar nie ook meesleur nie.

Liefste Valentyn:

Elvira vermoed lankal Marius gebruik haar. Die hospitaalgange dreun oor hom en die baas se dogter. Reuel, die nuwe chirurg, wil Marius jaloers maak, en Elvira wonder – is sy verpletter? Of dalk verlig?

Engel sonder vlerke:

Minette se laaste studiejaar ontaard in ’n nagmerrie toe sy self moet sorg vir elke sent wat sy benodig. Sy waardeer beslis nie die enigmatiese dokter Hugo Storm se ongevraagde inmenging in haar lewe – of haar hart – nie.

Lelies vir Louisa – Rosita Oberholster

Sy is omring van liefde maar weet nie waar sy vandaan kom nie. Dit is die droefheid waarmee Louisa worstel. Sy wil niks van haar ouers hê nie, net weet wie hulle is en hoekom hulle haar nie wou hê nie. Soos sovele ander kinders wat hulle biologiese ouers uiteindelik vind, is dit nie maanskyn en rose in elke opsig nie.

Nie net oor wie hulle is en hoe hulle oor haar voel nie, ook oor die afskuwelike geheim in hulle familie – haar familie, besef sy. Dit is haar bloed wat tot sulke dade in staat was.

Louisa besef egter al het sy nie beheer oor haar lewe tot dusver gehad nie, is dit net sy wat kan besluit hoe haar en haar baba se lewe van hier af verloop. Maar sal sy goed genoeg wees vir ’n man? Sy, ’n weeskind en self die moeder van ’n buite-egtelike kind? Dit is wat haar verhoed om in liefde te glo toe ’n man haar liefkry vir wie sy is en haar syne wil maak.

Dowe gode – Dibi Breytenbach

 

Kaptein Aella O’Malley van die Suid-Afrikaanse polisie word uitgeroep na waar ’n plaasaanval aangemeld is. Die slagoffers is vriende van haar en haar lewensmaat wat kort gelede oorlede is. By nadere ondersoek strook dit egter nie met ’n “gewone” plaasaanval nie. Wie gebruik militêre aanvalswapens om mense te beroof? Het dit iets daarmee te doen dat dit ’n wildplaas is? Maar daar is geen wild geroof nie, net die kluis waarin daar ook wapens was.

Terwyl sy verbete probeer deurdring na die oorsaak van hierdie geweld loop sy haar ook vas teen die brutaliteit van boere wat keelvol is vir plaasaanvalle op onskuldige mense, wat sy wil verstaan, maar ook nié. Saam met haar in die ondersoek is haar getroue kollega Whistler en Leblanc, laasgenoemde ’n Fransman van Interpol wat Suid-Afrika toe gestuur is om te kom kyk wat word van die geld wat Europa skenk vir renosterbewaring.

Toe sy die baasbrein van die plaasaanval vastrek, onthou sy die spreekwoord oor   “die pad na Opathe”: Pasop vir ’n hinderlaag, pasop vir verraad.

 

Los 'n boodskap

Jou epos adres sal nie gepubliseer word nie.

U mag hierdie HTML tags en eienskappe gebruik:

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>