Stoppelbaardsoene in Santorini – Cecilia Steyn

In die kombuis druk Gita haar kop ’n oomblik in die yskas. Sy moes omtrént nou haar pose hou en haar tong middeldeur byt om te keer dat sy vir Isak Clark vertel presies wat sy van hom dink. Gelukkig het die seun hulle onderbreek.

Omdat hy betaal het, kan hy bly? Wie dink hy is hy? Sy wens net Ellie het haar teen die ongeskikte man gewaarsku. Sal sý die kind moet besig hou? Gita sit haar hand op haar heup. Deur die kombuisvenster kyk sy of Isak Clark nog daar staan.

Nee! Hy staan sowaar haar selfhelpboek en deurkyk. Die vent skud sy kop. Gita vee oor haar voorkop. Al moet sy dit nou self erken, is hy die mooiste ongeskikste vent wat sy nog gesien het. Daardie sterk kakebeen met die kuiltjie in sy ken. En kan ysblou oë so warm lyk? Sy postuur is dié

cecilia steyn 27

van ’n man wat nie nonsens vat nie, maar wat ook sag met ’n vrou kan werk.

Ag nee, magtig. Waaraan dink sy tog? Sy hoop nie sy soek nou haar trouman in elke lid van die teenoorgestelde geslag wat haar pad gaan kruis nie. Isak is seker ’n bedorwe brok wat altyd sy sin kry.

Wat is nou so erg daaraan dat sy ook hier bly? Wag net tot hy haar kos proe. Dán sal hy vinnig van mening verander.

Net jammer hy dink hy kan so met mense praat. Geen wonder die kind het kamer toe gevlug nie, met so ’n pa sou sy seker ook. Hy beter net nie vir Ellie bel en haar sê presies wat hy van haar reëlings dink nie. Sy het nie nou ekstra spanning nodig nie.

Toe sy weer deur die venster loer, lê hy op een van die stoele. Sommer so in sy pak klere. Hy is seker een van daardie finansiële tipes wat bang is sy bankbalans sal verminder as hy nie ’n pak klere aanhet nie.

Sy sug hardop. Die oomblik toe sy in daardie staalagtige oë van hom kyk, het haar hart net ’n bietjie te vinnig na haar sin geklop. Haar palms het selfs klam geword, iets wat sy nog nooit vantevore ervaar het nie. En dit met een kyk! Daarvan staan niks in haar boek nie.

Sy waag weer ’n kykie na waar hy lê. Sy hemp is nie eens gekreukel nie en dit ná ’n lang reis hierheen. Om so perfek te wees is seker uitputtend want hy lyk gedaan.

Om nie te praat van die kind met al die swart klere nie. ’n Mens sal sweer iemand is dood of iets. En daai ring in sy neus laat hom lyk asof hy eerder by ’n bulgeveg in Spanje hoort. Daardie humeur ook. Sjoe, sy kry amper die arme pa jammer . . . amper. Dis net, hy lyk nog heeltemal te jonk om so ’n groot kind te hê.

Gita begin met een hand vir Ellie ’n boodskap tik terwyl sy met die ander een bestanddele op die werkblad pak. Hopelik, as die vent kos in sy maag het, sal daardie mooi mond van hom kan glimlag en sal hy miskien sommer ontspan ook. Genade, hy is immers in Santorini!

Jy weet dis ’n buffel en ’n swart geklede warrelwind wat jy vir my gestuur het, nè? Jy moes hom dalk maar gesê het ek sal ook hier bly. Meneer besluit nog of hy die huis met my wil deel of nie.

Is dit so erg?

Ja! Tik sy. En jy het die dae verkeerd! Nou skarrel ek om vir hulle kos te maak.

Sy wonder of Ellie haar aspris dom hou.

Jammer tog. My kop is deesdae op ander plekke. Sal jy asseblief mooi na hulle kyk? Soos jy altyd na ons kyk. Geniet jou verlof! En kyk uit vir daai man van jou drome.

Dit is hemelse geure wat Isak laat wakker word. Toe hy regop sit, val die boek wat op sy borskas gelê het grond toe. Wanneer het hy aan die slaap geraak? Ná sy uitputtende reis wou hy net vyf minute rus en vrede hê. Om homself te amuseer het hy die pop se pienk boek nadergetrek. Hy strek en tel dit op.

Wat ’n spul bollie. Tog het hy homself gevang dat hy bly lees. Watter tipe man soek jy? Passievol, sensitief, belangstellend, betroubaar, veilig of waaghalsig? Die vraag het sowaar in sy kop begin rondrol. Watse tipe man is hy? Nie dat hy in ’n langtermynverhouding belang stel nie. Daarvoor sal hy seker nooit reg wees nie. Die oomblik wat vroue die l-woord in gesprekke begin noem, sorg hy dat hy die verhouding beëindig. Want die l-woord word gewoonlik gevolg deur die t-woord wat in sy opinie veel erger is. Hy kan homself net nie vir die res van sy lewe saam met een vrou sien nie. Veral nie nou nie. Hy is nie die tipe wat die vullis sal uitsit en doeke help omruil nie. Daarvoor is hy te besig. En dis wat vroue wil hê. ’n Ridder op ’n wit perd. Hy het homself nog altyd as die stil sterk tipe beskou. Van hulle staan daar niks in die boek nie.

“Die kos is gereed.” Gita se stem ruk hom terug realiteit toe. Toe hy omkyk deur toe, staan sy daar met ’n breë glimlag. Haar oë sak na die boek in sy hande en hy besef dis nie vir hom wat sy so mooi glimlag nie.

“Enige tips gevang?” roep sy laggend.

“Ek het dit nie gelees nie,” probeer hy red wat te redde is. Maar die dik wenkbroue wat netjies getem is, lig alwetend voor sy omdraai. Van agter af kan hy sien hoe haar skouers nog ’n keer ruk. Die laaste ding wat hy nou nodig het, is vir sy au pair en huishoudster om te dink dat hy haar droomman kan wees.

“Haai, ek is Jaco.” Isak staan ’n oomblik in die deur. Jaco trek ’n stoel by die vrolik gedekte tafel uit. Hy kon ook seker nie die geure weerstaan nie. En is dit ’n glimlag?

“Ek is Gita,” sê sy vriendelik

 

Los 'n boodskap

Jou epos adres sal nie gepubliseer word nie.

U mag hierdie HTML tags en eienskappe gebruik:

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>