My ster jou ster – Malene Breytenbach

“Jy is een van die beste spinto-soprane wat ek al onderrig het,” sê madame Rolandi. “Julle kry die lekkerste rolle. Jou houding is reg, jou voorkoms is mooi, maar ons moet werk aan jou projeksie. Jy moet jou woorde kleiner kry en dink jy stuur die klank deur ’n buis. Dink aan die betekenis van die woorde. Beweeg jou stem vorentoe na jou bokaak en neus. Ons Italianers noem dit la maschera, die masker.”

Sy stut Tatiana se nek met al twee haar hande. “Weer.”

Tatiana gee haar alles en sing die dramatiese hoë note van die aria. Sy weet dit is die beste wat sy nog gedoen het.

Sy skrik toe die oefenateljee se deur oopgaan en ’n man met wit hare inkyk. “Moenie jou sopraan vermoor nie, Lucretia,” sê hy met ’n grinnik.

Madame Rolandi los Tatiana, wat dink sy gaan kwaad word want sy duld nie onderbrekings nie, maar tot haar verbasing gee madame Rolandi ’n gilletjie en storm op die man af. “Vabond, jy is ’n dag laat. Ek het jou gister verwag.”

“Jammer, Lucretia, Daar was weer ’n oponthoud aan die Russiese kant,” sê hy.

Hy kom ingestap. Tatiana staan verstom. Kan dit regtig die groot Russiese bariton wees?

Sy het hom nog net in foto’s en film gesien, nie in lewende lywe nie. Totaal gemesmeriseer kyk sy na hom. Hy is langer as wat sy gedink het en breedgeskouer. In sy swart leerbaadjie, swart denim en wit hemp lyk hy lenig en fiks. Sy silwer hare blink in die lig van die kandelare. Op die bruingebrande, sterk gesig van ’n man in sy middel dertigs is ’n glimlag. Daardie mooi mond met eweredige tande waaruit hemelse klanke kan kom, het haar gefassineer toe sy hom gesien het op youtube en in ’n opera wat by die Metropolitan Opera in New York verfilm is. Sy weet maar alte goed van sy reputasie as een van die groot sangers van die tyd en sy klaarblyklik magnetiese persoonlikheid. Noudat sy hom hier voor haar sien,

weet sy ook waarom hy as die wêreld se sexyste bariton bekend staan.

Hulle noem hom ook die Siberiese tier. As ’n man ooit dierlike magnetisme gehad het, is dit dié man van Slawiese afkoms met sy swart oë en silwer hare by ’n jong, bruingebrande gesig. Sy kan sweer hy het Tartaarbloed in sy are.

Madame omhels hom en soen hom met klapklanke op albei wange. “Wel, nou is jy uiteindelik hier.”

Hy kyk met ’n geamuseerde uitdrukking op sy gesig verby haar na Tatiana. Dit voel meteens asof haar bene lam raak. Hy straal ’n manlikheid en selfversekerdheid uit wat seker omtrent alle vroue se bene lam maak.

“Tatiana, ontmoet Igor Radonowski,” stel Madame hom voor. “Die enigste mens wat ek sal toelaat om my so onbeskof te onderbreek. Igor, hierdie jong dame is Tatiana Barnard, ’n Suid-Afrikaanse sopraan wat hier in Milaan die rol van Gilda moet oorneem en nou oefen ons verwoed.”

Hy steek ’n groot hand uit wat Tatiana s’n omvou. Die aanraking skok haar behoorlik. Sy kyk op in sy swart oë onder donker wenkbroue. “Dit is vir my ’n groot eer om die groot Russiese bariton te ontmoet, meneer Radonowski.”

Hy glimlag. “Die eer is myne. Jy toon ongetwyfeld groot belofte, anders het madame Rolandi jou nie onderrig nie.”

Hemel, hy is nog so sjarmant ook dat dit haar voete onder haar uitslaan. Groot operasterre is gewoonlik geneig om meerderwaardig te wees en hulle nie juis aan die opkomendes te steur nie. Nou kan hy egter nie anders nie, want dis net sy, madame Rolandi en die pianis in die vertrek.

Hy draai weg na madame Rolandi. “Ek kon darem betyds kom vir vanmiddag se kleedrepetisie. As jy nie te besig is nie, kom kyk gerus en gee kritiek. Ek het nog nie met die sopraan saamgesing nie. Sy is ’n Amerikaner wat by die Met gesing het.” Hy vertel in watter saal dit gaan wees.

Hy kyk na Tatiana. “Jy kan ook kom as jy lus het.”

“O, ja, graag.” Hemel, vir wat klink sy nou so oorhoops! Maar sy wil regtig gaan kyk en dit is so vleiend dat hy haar persoonlik genooi het.

“Ons sal kom,” sê madame Rolandi. “Ek sien jou vanaand vir ’n laat aandete. Ons moet inhaal.”

“Absoluut.” Hy grinnik vir haar, vir Tatiana, en loop uit.

Die deur is al agter hom toe, maar Tatiana staar nog oorbluf daarna.

“Toe, toe,” lag madame Rolandi. “Ek weet hy is oorweldigend, maar kom terug aarde toe. Hy is ’n baie mooi man en ’n wêreldklas sanger, maar hy loop nie rond nie en hy is getroud met ’n mede-operaster.”

Tatiana se gesig brand soos sy bloos. “Ek … dis die eerste keer dat ek hom ontmoet.” Sy kug en staan reg om weer die aria te sing.

Maar haar balans is totaal versteur.

Los 'n boodskap

Jou epos adres sal nie gepubliseer word nie.

U mag hierdie HTML tags en eienskappe gebruik:

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>